blog.chlehmann.ch

Gwitter si doch öppis schöns, nid? Irgendwie äs faszinierends Schouspi! I luege henne gärn eifach zue u dänke a nüt!

U da ig ir letschti gärn zwüschedüre zur Cam griife, hani dänkt i probiers mau chli. Het sech du aber aus schwiriger erwiise aus agno, sone Blitz uf Fium ufd Charte z’Banne! Hie äs par Sache, womesech sött merke, weme Gwitter fötelet:

• D’Idee, z’Stativ ufzsteue sött me ha, bevor z’Gwitter scho fasch verbii isch
• Am Blitz isches glich, öb dr’Verschluss vor Kamera offe oder zue isch, wenner blitzt
• Äs isch ihm o glich, dört abe z’gah, wome grad nid häreziilet!

Naja, einisch hanine du doch verwütscht (vo ganze 60 Biudli). Z’Resulatat isch eher ernüechternd, aber wemes chli bearbeitet gsehts durchuus interessant uus:

Löht nech nid la wecke vom Gwitter! Guet Nacht!

*grmpf*! Scho z’zwöite Mau sit drei Mönet louft mini Vista-Installation ufem Laptop nüme. Är het ke lust z’Starte, ud Widerhärstellig funktioniert o nid. Langsam längts mer. I wirde äue wider uf XP umsteue. Das isch wenigstens nid sones Pöteterli gsi, wie das müehsame, langsame und instabile Vista!

Dr haub Tag isch verlore wäge däm blöde Seich! Fägt nid, nach de Ferie so azfah. I hoffe mau dr Räste vor Wuche wärd wenigstens besser!

Wünsche ä bessere Start id Wuche aus ig ne ha gha! Gniesset z’Wätter!

No zwe Täg ir Houptstadt, u när geits ab id Schwiiz! I verabschidemi miteme lachende und eme tränende Oug:

Knappi 2000km Wäg heimer gmacht, u si nach eire Rundi umd Insle schlussändlech wider am Usgangsort acho. Mir hei viu gseh u erläbt uf dere schöne Insle! Z’Wätter isch sehr guet bis isländisch schlächt gsi, aber äs het trotzdäm viili iidrücklechi u faszinierendi Sache gä, wome het chönne bestuune!
Äs git äue (villech? ) de no ä usfüehrlechere Reisebricht, aber äs churzes Fazit gits glich scho: Äs wird sicher nid mi einzig Bsuech uf dere Insle blibe! Ig ha sehr viu wunderschöni Iidrück gsammlet, geniali Landschafte gseh und faszinierendi Naturschouspiu! I cha jedem empfähle, d’Insle vo “Füür u Wasser” einisch säuber z’bsueche!!
D’Föteli chöi wiiterhin hie agluegt wärde, äs het sogar no äs pari meh gä!

Häbets guet, bis gli!

Hallo zäme

Nume churz äs chlises Brichtli, u äs par Biudli. Ig hocke amene Campingplatz am Myvatn-See u bi am früüre Aber eigentlech o nume wüu d’Sunne hinger par Wuche isch, und ä chaute Wind geit. Bis jetz isch z’Wätter super gsi, u warm.

Wasmer erläbt hei (in seeehr kürze):

• Gulfoss
• Geysir
• Whale-watching
• und so wiiter

Biudli

Bye zäme, bis villech speter no einisch!

20,00 kg bringt mini Täsche uf d’Waag, äs längt grad. Mitnä tuet is hüt Aabe äs Flugzüg vo “Iceland-Express” i äbe das Land. I bi gspannt wasis dört so erwartet. Äs wird sicher seeeeehr viu Biudli gä, wenni irgendwo ä Accesspoint finge sogar während dene zwe Wuche hie uf dere Siite.

U o wenns kes Biudli gäb, dr eint oder anger wo hie mitlist wird sicher o mau Post übercho !

Sofern aues nach Plan verlouft (da gani eigentlech drvo uus) wirdeni am 26. Juli wider uf CH-Bode ufschlah lande. Häbets guet liebi Lüütlis! Trotz der Ferie-Vorfreud chumi de o gärn wider hei!

Maria, Maria, Mariiiiiiiiiiiiiiiiiiiiiiiiiia…

I ha gester vode Täuspiu uus gratis z’Musical “West Side Story” bide Thuner Seespiu chönne ga luege. I mues säge, i bi nid so überzügt gsi: dr Räste vom Biitrag läse »

Huch, Glück gha … Ig ha ide letschte 48h zwe Flüg gha, uf Berlin und zrüg. U bi beidne hani im Sack vo mire Jagge öppis drbi gha, womi ine “chli” schwirigi Situation hätt chönne bringe… Aber vo vore:

Im Täuspiu wird d’Burg mit Geel-artigem Brandbeschleuniger abgfacklet. Dä widerum wird vo elektrische Zünder usglöst. Das chamesech wine Frouefurz mit Kabu vorsteue; wenn me Strom ufz Kabu git explodierter, u bringt so die Brandpaste zum brönne.

Woni d’Burg z’letschte Mau mit söttigne Zünder usgstattet ha, hani eine z’viu i Sack gno. U dört ischder de bi beidne Flüg immer no gsi, ohni dasis gwüsst hätt

I finges aber no interessant, dass z’Röntgegrät vom schwiizer und vom dütsche Flughafe nüt gseh het. Mini Theorie isch, dass d’Frou wo söttigi Sache sött finge, eifach z’fest vo mir abglänkt isch gsi… Jä guet, zwar eher nid

Mi Chef het währendem Flug – wonis entdeckt ha – das ding miteme Chätschgummi ad Cockpittür wöue chläbe. Hanims du aber Usgredt