blog.chlehmann.ch

Wow! Fasch zwe Stung Action und Spannig ohni Pouse… Ha dä Fium grad im neue Multiplex-Chino im Westside gseh, u i mues säge, bi ächt begeisteret. Klar isch d’Story einisch meh zimli übertribe, aber glich irgendwie aasatzwiis vorsteubar. Aber im Prinzip spiut d ächtheit eh ke Roue, houptsach äs chlepft und täscht U das hets definitiv! Wie im Pathé üeblech hets ke Pouse gäh, u das isch o nid nötig gsi. Me isch würklech zwe Stung lang a Sitz gfesslet gsi, u äs isch nie längwiilig worde!

Cha dä Fium witerempfähle, äs lohnt sech sehr!

Lang hets duuret, bis dr nöi Indy si abentüürlech Wäg id Chinos gschafft het. U bi eire vode erste Vorstellig (CH-Vorpremiere), bi gester o ig und äs par Kollege drbi gsi. U i mues säge, är het mi chli enttüscht.

Ig ha mittlerwiile aui 4 Fiume gseh, u dä isch definitiv dr schlechtist! Äs het viu z viu Sci-Fi Elemänt drinne, wo gar nid drzuepasse. Wenn ig UFOs und Marsmönschli wott gseh, chani o M.I.B luege…
Wär ä würdige Nachfouger zu Indy 3 wott gseh, dä söu sech National Treasure mitem Nicolas Cage aluege. Dä isch spannend, u spiut uf der Ärde

Bi widermau mit de Bruefsschueu-Kollege ä Fium ga luege… Dr Titu: Vantage Point.

Äs geit umnä Aaschlag ufe amerikanisch Presidänt. Dr Fium wird usem Blickwinku vo 8 verschidene Persone zeigt, so git sech nadisna äs Gsammtbiud. Am Afang chunnt ä chli viu z gliche vor (äbe wäge dene Blickwinkle), aber gäge Schluss gits no zimli mängi unvorhärgsehnigi Wändige. Wiudi Schiessereie und ä cooli Panzer Corsa-Verfougigsjagd runde die ganzi Sach ab!

Z viu verrate wetti nid, aber schiitere tuet dr Terrorplan wägeme chline Meiteli mit Glace… Dr Terrorist wird sech ufgregt ha

Göt ne ga luege, schautet z Hirni ersch nach der Pouse ii, wüu denn faht mes afa bruche! Fägt, gmüetlech für ne Mittwuch Aabe!

…am Fritig gseh. Dr Fium isch am Afang chli Längatmig, entwicklet sech aber zure intelligänte Komödie, mit viu Witz und Tiefgang.

Churz zämegfasst: Zwe Chräbschranki Manne lehre sech im Spitau kenne. Si chönnte nid verschidener sii: Dr eint isch Millionär und Gschäftsmaa, dr anger probiert miteme Outomech-Job sini Familie über Wasser z haute. Wo si beidi erfahre, dass si no äs haubs Jahr z’läbe hei, steue si ä “Bucket List” – Gras Liste – uuf. Dank em Riichtum vom Gchäftsmaa chöi si di Liste o abarbeite. Äs faht bi Bungee-Jumping a, u hört uf miteme Bsuech bir Tochter vom Riiche.

Dr Jack Nicholson und dr Morgan Freeman hei ihres Handwärk im Griff, u passe tiptop zur Roue.

Aues in Auem: Äs lohnt sech!

… gester Aabe gseh. Dr Fium isch iidrücklech, aber o zimli übertribe. D’Vorstellig, dass äs Killervirus eines Tages die haubi Ärdbevöukerig chönnti umbringe (im Fium sis 90%) isch no extrem. Aber das die rästleche Lüüt zu gfährleche u bluetrünstige Monster wärde isch doch eher unvorsteubar

“My name is Robert Neville. I am a survivor living in New York City. I am broadcasting on all AM frequencies. I will be at the South Street Seaport everyday at mid-day, when the sun is highest in the sky. If you are out there… if anyone is out there… I can provide food, I can provide shelter, I can provide security. If there’s anybody out there… anybody… please. You are not alone.”

I würd säge d’Story isch ungerhautsam aber wie gseit übertribe, d’Biuder (u d’Technik drhinger) si iidrücklech, u d’Spannig extrem. Erchlüpfe tuet me meh aus einisch, o wenn mes gseht cho